Синоќа се појавија информации дека Џон Тошак му нудел трансфер на Азиз во Барселона или Реал Мадрид во замена за настап за македонската репрезентација.

 

Сега ФФМ и Тошак категорично демантираат контакт со турскиот фудбалер.

 

"ФФМ и Г-динот Тошак се свесни дека постојат играчи кои играат во странство а се со македонско потекло и имаат право на настап за нашата најсилна репрзентација, меѓутоа и ФФМ и селекторот официјално не стапиле во контакт со некој од нив а посебно не со Сердар Азиз" - стои во соопштението на ФФМ.

 

"ФФМ ја користи оваа прилика уште еднаш да потсети дека принцип на работа на федерацијата е да ги контактира сите играчи кои играат во странство а се со македонско потекло но само доколку ФФМ процени дека можат да го подигнат рејтингот на македонскиот фудбал".

 

"Со Сердар Азиз соодветните служби на ФФМ воопшто не контактирале и затоа целосно ги демантираме изјавите на играчот дека ФФМ официјално го контактирила а тој учтиво ја одбил понудата". 

 

Изјавата на Џон Тошак во која е зачуден од несериозноста на фудбалерот, гласи:

 

"Да дадеш ветување на одреден играч дека ќе му направиш трансфер во Реал Мадрид или Барселона само затоа што некогаш си бил тренер или живееш таму е многу несериозно и смешно. Уште понесериозно е кога некој играч ја користи таа фраза, моето име и македонската репрезентација за да си направи добар маркетинг".

 

"Категорично тврдам дека ниту сум се јавил на Сердар Азиз ниту сум му понудил такво нешто. За жал ова е уште еден случај кога моето име се употребува за личен бенефит" изјави селекторот Тошак".